/** * https://gist.github.com/samthor/64b114e4a4f539915a95b91ffd340acc */ (function() { var check = document.createElement('script'); if (!('noModule' in check) && 'onbeforeload' in check) { var = false; document.addEventListener('beforeload', function(e) { if (e.target === check) { = true; } else if (!e.target.hasAttribute('nomodule') || !) { return; } e.preventDefault(); }, true); check.type = 'module'; check.src = '.'; document.head.appendChild(check); check.remove(); } }());

Ysgol Dyffryn Aman: Merch, 14, yn euog o geisio llofruddio

Fiona Elias a Liz Hopkin

Y ddwy athrawes a gafodd eu trywanu - Fiona Elias a Liz Hopkin - y tu allan i'r llys wedi'r dyfarniad ddydd Llun

Mae merch 14 oed wedi ei chael yn euog o geisio llofruddio dwy athrawes a disgybl yn Ysgol Dyffryn Aman.

Cafodd Liz Hopkin, Fiona Elias a disgybl eu trywanu yn ystod amser egwyl yn yr ysgol yn Rhydaman ar 24 Ebrill 2024.

Roedd y ferch, na allwn ei henwi am resymau cyfreithiol, yn cyfaddef iddi drywanu'r tair, ond yn gwadu tri chyhuddiad o geisio llofruddio.

Roedd hi'n ddi-emosiwn wrth i'r rheithgor gyhoeddi'r dyfarniadau, ac mae disgwyl iddi gael ei dedfrydu cyn diwedd Ebrill.

Dywedodd y barnwr, Paul Thomas KC, bod yr achos wedi bod yn un "anodd ac anarferol".

Cafodd y fideo CCTV yma o'r digwyddiad ei ddangos i'r llys

Daeth y dyfarniadau ar ddiwedd achos a barodd am ychydig dros wythnos, ac fe gymrodd y rheithgor dros bedair awr i ystyried y dystiolaeth.

Bu'n rhaid cynnal yr achos o'r newydd fis Ionawr wedi i'r un cyntaf ddymchwel ym mis Hydref oherwydd "anghysondeb mawr" yn y rheithgor.

Wrth grynhoi'r achos yn gynharach ddydd Llun, dywedodd bargyfreithiwr yr amddiffyn bod dim digon o dystiolaeth i brofi bod y ferch wedi bwriadu lladd y tri dioddefwr, serch unrhyw "sioc, syndod neu arswyd" y gallai'r rheithgor fod wedi eu teimlo wrth glywed y dystiolaeth.

Ychwanegodd Caroline Rees KC bod gan y diffynnydd, oedd yn 13 oed ar y pryd, "gefndir o unigedd a hunan-niwedio", a'i bod yn "ffaith drist iawn bod y ferch wedi dod i'r arfer o gario arf i'r ysgol bob dydd" am ei bod yn ofni cael ei bwlio.

Ond roedd yr erlyniad yn dadlau bod yr ymosodiadau "yn fwriadol ac wedi eu hailadrodd", ac y gallai'r anaf i wddf Liz Hopkin fod "fod wedi arwain at rywbeth lawer mwy difrifol".

Yn ôl William Hughes KC, roedd darluniau'r ferch, yn cyfeirio at ladd Fiona Elias a'r disgybl a gafodd ei thrywanu, yn amlygu ei chyflwr meddyliol ar y pryd.

Plismones tu allan i Ysgol Dyffryn Aman ddiwrnod yr ymosodiad

Clywodd yr achos bod y diffynnydd wedi cario cyllell i'r ysgol

Clywodd y rheithgor bod y ferch wedi dweud "Dwi'n mynd i dy ff**** ladd di" cyn trywanu Fiona Elias, ac fe drywanodd Liz Hopkin yn ei gwddf wrth i hithau geisio ei rhwystro.

Fe ddefnyddiodd y ferch eiriau tebyg wrth redeg wedyn at gyd-ddisgybl, wrth i athrawon geisio'i hatal.

Clywodd y llys bod y ferch wedi dangos cyllell i'w ffrindiau y bore hwnnw gan ddweud ei bod "yn mynd i wneud rhywbeth fyddai'n arwain at gael fy niarddel" a'i bod "yn mynd i drywanu Ms Elias".

Daeth yr heddlu o hyd i ddarluniau gan y diffynnydd oedd yn cyfeirio at y disgybl a gafodd ei thrywanu ganddi, a "Mrs Frogface Elias".

Roedd rhai o'i nodiadau'n cynnwys yr ymadroddion "dwi eisiau gwneud rhywbeth dyw pobl ddim fod i wneud", "pam ydw i eisiau lladd eraill gymaint â dwi eisiau lladd fy hun">