/** * https://gist.github.com/samthor/64b114e4a4f539915a95b91ffd340acc */ (function() { var check = document.createElement('script'); if (!('noModule' in check) && 'onbeforeload' in check) { var = false; document.addEventListener('beforeload', function(e) { if (e.target === check) { = true; } else if (!e.target.hasAttribute('nomodule') || !) { return; } e.preventDefault(); }, true); check.type = 'module'; check.src = '.'; document.head.appendChild(check); check.remove(); } }());

A&E Steòrnabhaigh an ìmpis fosgladh às ùr

Chuir manaidsear Cùram Èiginneach an ospadail, Janette Mhoireach (clì) fàilte air Peigi NicLeòid (na seasamh) agus Anna NicLeòid (na suidhe) a bha roimhe nan nursaichean, is iad a' toirt sùil air na goireasan ùra

Chuir manaidsear Cùram Èiginneach an ospadail, Janette Mhoireach fàilte air Peigi NicLeòid (na seasamh) agus Anna NicLeòid (na suidhe) a bha roimhe nan nursaichean, is iad a' toirt sùil air na goireasan ùra

Ailean MacLeòid
Fear-naidheachd Didseatach

Fosglaidh ionad A&E Ospadal nan Eilean ann an Steòrnabhagh a-rithist Diciadain an 4mh den Ògmhios.

Chaidh £1m a chosg air ath-sgeadachadh an ionaid, le uidheamachd ùr ga cur an sàs cuideachd.

Thòisich an obair sa Ghearran agus anns na 13 seachdainean mu dheireadh chaidh siostam analachaidh ùr a chur ann, le trì seòmraichean do dh'euslàintich a tha ann am fìor èiginn a-nis seach aon mar a bh' ann roimhe.

Thuirt Gòrdan Jamieson, Àrd-oifigear NHS nan Eilean Siar, gun robh e soilleir dhaibh gun robh na leasachaidhean a dhìth agus gun robh iad air an dòigh glan leis na goireasan ùra.

Ospadal nan Eilean

Tha fàs anns na tha de luchd-turais a tha a' tighinn a Leòdhas agus na Hearadh agus mar a tha busaichean dà-ùrlair gan cleachdadh san eilean am measg nan adbharan gun robh feum air goireasan ùra.

Sheall tubaist air bòrd a' bhàta-iasgaich Spàinnich, an Lodario, cuideachd gun robh barrachd air aon seòmar ath-dhùsgaidh a dhìth san Ospadal.

Bha aon iasgair air fhìor dhroch leòn mu a chasan agus bha casan fear eile glacte ann an uidheamachd iasgaich an t-soithich agus bha esan cuideachd air a ghoirteachadh gu dona.

Thachair seo far chosta Leòdhais ann an 2023 agus b' fheudar cobhair èiginneach a thoirt dhaibh ann an Steòrnabhagh is ospadalan tìr-mòr ro fhada air falbh airson a bhith sàbhailte an dithis a ghluasad.

Ospadal nan Eilean

Tha Manaidsear an Ionaid Èiginn, Susan NicAmhlaigh, air a bhith ag obair ann fad 27 bliadhna.

"'S urrainn dhomh a ràdh gur e seo an t-atharrachadh a bu adhartaiche a chunnaic mi.

"Cha mhòr gun gabh an goireas ùr aithneachadh, le àrainn chlionaigeach ùr ann agus àitichean na 's fheàrr airson cobhair a dhèanamh air euslaintich leis an uidheamhachd agus an teicneòlas as ùire."

Tha an siostam analachaidh ùr comasach air aidhear am broinn an ionaid ùrachadh 10 tursan gach uair a thìde.

Tha dà sheòmar do dh'euslaintich a th' ann am fìor dhroch staid gu bhith ann fad na h-ùine, le seòmar eile a ghabhas cleachdadh airson sin no mar dhà sheòmar-leigheis àbhaisteach a rèir feumalachdan an luchd-obrach.

Ospadal nan Eilean

Tuilleadh air an sgeulachd seo