Трамп: "Путин ақлдан озган" — Россиянинг Украинага йирик ҳужумидан сўнг АҚШ президенти кескин баёнот берди - Видео

АҚШ президенти Доналд Трамп Россия президенти Владимир Путинни Украинага қилинган кучли ракета ҳужумидан сўнг кескин танқид қилди.

Якшанба кунги ҳужумда 12 киши ҳалок бўлди. Трамп аввал ҳам Путинни танқид қилган, аммо бу сафарги баёнот Истанбулда тинчлик музокараларини бошлаш ҳаракатлари манзарасида янгради.

"Путиннинг қилган ишларидан норозиман. У жуда кўп одамларни ўлдиряпти, жин урсин, унга нима бўлаётганини билмайман. Уни анчадан бери биламан, ҳар доим келишганмиз, лекин у шаҳарларга ракеталар жўнатяпти, одамларни ўлдиряпти. Бу менга умуман ёқмаяпти", деди Трамп Вашингтонга кетишда.

Трамп, шунингдек, Россияга нисбатан санкцияларни кучайтириш масаласини кўриб чиқишини айтди: "Унга нима бўлаётганини билмайман. Жин урсин унга нима бўляпти? Тўғрими? У кўп одамларни ўлдиряпти. Мен бундан норозиман".

Трамп бу баёнотини Украина пойтахти Киев ва бошқа шаҳарларга уруш бошланганидан бери қилинган энг йирик ҳужумга жавоб тариқасида билдирди. Ҳужум оқибатида мамлакат бўйлаб 12 киши ҳалок бўлди, ўнлаб одамлар яраланди.

Трамп ўзининг Truth Social ижтимоий тармоғида ҳам Путинни танқид қилишда давом этди.

"Россия президенти Владимир Путин билан ҳар доим яхши муносабатда бўлганман, лекин унга нимадир бўлди. У мутлақо ақлдан озди! У жуда кўп инсонларни бекорга ўлдиряпти, гап фақат аскарлар ҳақида эмас. Ракета ва дронлар Украина шаҳарларини сабабсиз ўққа тутмоқда", — деб ёзди Трамп.

"Унга бир қисм эмас, балки бутун Украина керак эканлигини ҳар доим айтганман. Балки ҳозир биз шунинг тасдиғини кўраётгандирмиз. Агар у шундай қилса, бу Россиянинг ҳалокатига олиб келади!" — дея қўшимча қилди АҚШ президенти.

Кремл вакили Дмитрий Песков BBC саволига жавоб бераркан, АҚШ президентининг баёнотларини ҳиссий реакция деб атади. Унга кўра, Москва Трампга Россия ва Украина ўртасида музокаралар жараёнини йўлга қўйишдаги кўмаги учун миннатдорлик билдиради.

"Бу жуда масъулиятли паллада юз бераётган ҳолат, бу эса, табиийки, ҳамманинг ҳиссий жиҳатдан чарчаши ва шунга яраша ҳиссий реакцияларга боғлиқ. Биз барча муносабатларни диққат билан кузатяпмиз. Шу билан бирга президент Путин мамлакатимизнинг хавфсизлигини таъминлаш учун зарур бўлган қарорларни қабул қиляпти", — деди Песков.

Россия ва Украина ўртасида тинчлик музокараларини илгари суришга уринаётган Трампнинг Путин ҳақида қаттиқ баёнотлар бериши илк маротаба кузатилмаяпти. Бу сафаргиси, Россия ва АҚШ президентлари ўртасида 19 май куни ўтказилган шу йил ҳисобидан учинчи телефон суҳбатидан сўнгги биринчи катта танқид бўлди.

Россия ва Украина 2022 йил баҳоридан бери илк бор 16 май куни Истанбулда музокара ўтказди. Ҳозирча музокараларнинг ягона натижаси — 25 май куни якунланган "1000 га 1000" формуласи бўйича йирик ҳарбий асирлар алмашинуви бўлди. Иккинчи раунд қачон ва қаерда бўлиб ўтиши ҳозирча маълум эмас.

Украина президенти Володимир Зеленский эса Путинни музокараларга киришишни истамаслик ва урушни давом эттиришга интилишда айблади. Трамп эса ўз постида нафaқат Путин, балки Зеленскийни ҳам танқид қилди.

"Унинг айтган ҳар бир гапи муаммолар келтириб чиқаряпти. Бу менга ёқмаяпти ва дарҳол тўхтатилгани яхши. Агар мен президент бўлганимда, бу уруш ҳеч қачон бошланмасди. Бу Зеленский, Путин ва Байден уруши, "Трамп"ники эмас», — деб ёзди АҚШ президенти. — "Мен фақат катта ва жирканч ёнғинларни ўчиришга ҳаракат қилаяпман".

20 май: Путин ва Трамп Украина ҳақида узоқ суҳбатлашди, аммо сулҳ бўладими?

Россия Президенти Владимир Путин билан икки соатлик телефон суҳбати ортидан Доналд Трамп, агар Москва ва Киев ўртасидаги музокараларда илгарилаш бўлмаса, АҚШ Украинадаги урушни тўхтатиш ҳаракатларидан чекинишини айтди.

У, шунингдек, Россияга қарши санкцияларни оширмаслиги, чунки бу вазиятни ёмонлаштириши қилиши мумкинлигини билдирди.

Украина Президенти Володимир Зеленский эса америкаликларнинг бу жараёндан чиқиб кетишларини истамаслигини айтди.

"АҚШ ўзини музокаралардан ва тинчликка эришиш ҳаракатларидан ихоталамаслиги барчамиз учун муҳим, чунки акс ҳолда бундан фақат Путин манфаат кўради", - деди у.

Трампнинг айтишича, Россия ва Украина оташкесим музокараларини «зудлик билан» бошлайдилар.

Путин эса суҳбат конструктив ўтганини билдирди.

Бу Владимир Путин ва Доналд Трампнинг охирги уч ойдаги учинчи телефон сўзлашуви бўлди.

Лекин бу суҳбат Россиянинг Украинадаги урушига якун ясайдими?

Телефон суҳбатининг бошқа тафсилотлари ҳақида бирор нарса аниқ эмас.

"Қўшма Штатлар президенти жанговар ҳаракатларни тўхтатиш, ярашиш ҳақидаги мавқеини билдирди. Мен Россия тарафи ҳам Украина инқирозини тинч йўл билан ҳал қилиш тарафдори эканини урғуладим", - деди Путин.

Орадан сал вақт ўтиб Доналд Трамп шундай деди:

"Биз Владимир Путин икки ярим соат суҳбатлашдик. Ўйлайманки, рўй бераётган у ердаги даҳшатли вазият борасида илгари силжишга эришдик."

Ўзининг Truth Social ижтимоий тармоғида Президент Трамп, Россия билан Украина ўт очишни тўхтатиш ва урушга якун ясаш бўйича зудлик билан музокара бошлайдилар, деб пост қолдирди.

Трамп айтишича, ушбу фалокатли "қон ҳаммоми" тугаганидан кейин Россия АҚШ билан кенг миқёсли савдо қилишни истайди.

Ва Трамп Украина бўйича музокараларга Ватикан мезбонлик қилишни хоҳлайди, деди.

Ҳозирча эса Россиянинг уруши давом этаяпти.

Секинлик билан Россия армияси янада кўп Украина ерларини босиб олаяпти.

"Ойларки Москва мавқеи шундай бўлган: Россия Украинада узоқ муддатли оташкесимни истайди. Бироқ тафсилотлари бўйича ишлаш керак, айрим талаблар бажарилиши керак. Афтидан Америка, Европа раҳбарлари ва Киев 30 кунлик шартсиз оташкесим талаб қилганларига қарамасдан бу мавқеъ ўзгаргани йўқ", - дейди Би-би-сининг Москвадаги мухбири Стив Розенберг.

Би-би-си мухбири Трамп билан телефон сўзлашувида қатнашган Президент Путин маслаҳатчисидан "оташкесим вақтини муҳокама қилдиларми", деб сўради.

Йўқ, деган жавоб бўлди.

Трампнинг кўтаринки руҳдаги баёнотига қарамай, тинчлик битими яқин келажакда имзоланадиган кўринмайди.